JKR-SOTHY

கொலை வழக்கில் ராவணன்- பல மணி நேரமாக விசாரணை- பல்லடம் கோர்ட்டில்

2012-01-27T12:00:00.001-08:00

சசிகலாவின் நெருங்கிய உறவினரான ராவணன் கைது செய்யப்பட்டிருப்பது கிட்டத்தட்ட உறுதியாகி விட்டது. அவர் சாதாரண வழக்கில் சிக்கவில்லையாம், மாறாக கொலை வழக்கில் சிக்கியுள்ளதாக கூறப்படுகிறது. அவரை ரகசிய இடத்தில் வைத்து கோவை போலீஸார் விசாரித்து வருவதாகவும் தகவல்கள் கூறுகின்றன.
மன்னார்குடியைச் சேர்ந்த ராவணன், சசிகலாவின் சித்தப்பா மகளைத் திருமணம் செய்தவர். அந்த வகையில், சசிகலாவுக்கு இவர் தங்கை கணவர் ஆவார். கோவையில் வசித்து வரும் ராவணன், இங்கிருந்தபடி கொங்கு மண்டல அதிமுகவை ஆட்டிப் படைத்து வந்தார்.அதிமுகவில் இவரது ஆட்டம் அதிகமானது சமீ்ப காலத்தில்தான். கடந்த சில ஆண்டுகளாக இவர் போட்ட ஆட்டத்தால் அதிமுகவினர் கடும் எரிச்சலில் இருந்தனர். ஆனால் சசிகலாவின் ஆதரவால் எதிர்ப்பாளர்களை நசுக்கி வந்தார்.அரசுப் பணியிடங்களில் இடமாற்றம், நல்ல பசையான இடங்களுக்குப் போக விரும்பியோர் என பலரும் இவரைத் தேடிப் போகும் நிலையை ஏற்படுத்தினார். இதில் பெரும் பணம் பார்த்தார்.இதுதவிர நில அபகரிப்பு, மிரட்டல் என பல்வேறு புகார்களும் உள்ளன. கல் குவாரி உரிமம் உள்ளிட்ட விவகாரங்களிலும் இவரது பெயர் பெருமளவில் அடிபட்டது. இதில் இவர் மீது கோவையில் வழக்குப் பதிவாகியுள்ளதாக தெரிகிறது.சமீ்பத்தில்தான் கோவையைச் சேர்ந்த மாவட்ட பாஜக துணைத் தலைவர் ராதாகிருஷ்ணன் என்பவர் ராவணன் மீது நில அபகரிப்புப் புகார் கொடுத்தார் என்பது நினைவிருக்கலாம்.இந்த நிலையில் கோவை நடந்த ஒரு மர்ம மரணம் தொடர்பாக ராவணன் கைது செய்யப்பட்டிருப்பதாக தகவல்கள் கூறுகின்றன. சூலூர் பகுதியில் சமீபத்தில் செல்வராஜ் என்பவர் மர்மமான முறையில் உயிரிழந்தார். இது விபத்து என அப்போது கூறப்பட்டது. ஆனால் கொலை என அவரது மகன்கள் கூறி வந்தனர். இதுதொடர்பாக முதல்வர் ஜெயலலிதாவிடம் அவர்கள் நேரிலேயே மனு கொடுத்ததாகவும் கூறப்படுகிறது. இதையடுத்து அது கொலை வழக்காக மாற்றப்பட்டு அதில்தான் தற்போது ராவணன் கைதாகியுள்ளதாக கூறப்படுகிறது.தற்போது ராவணனை போலீஸார் பல்லடத்தில் வைத்து விசாரித்து வருவதாகவும் தகவல்கள் வெளியாகியுள்ளன. பல மணி நேரமாக தீவிர விசாரணை நடந்து வருகிறதாம். இதுவரை இதுகுறித்து போலீஸ் தரப்பில் கப்சிப் என உள்ளனர். ஆனால் ராவணன் கைது செய்யப்பட்டிருப்பது உண்மைதான் என்று நம்பகமான தகவல்கள் தெரிவிக்கின்றன.விரைவில் ராவணன் கைது குறித்து கோவை போலீஸார் தெரிவிக்கலாம் என்றும் கூறப்படுகிறது. அவர் பல்லடம் கோர்ட்டில் ஆஜர்படுத்தப்படுவார் என்றும் எதிர்பார்க்கப்படுகிறது.ஒருபக்கம் கைது நடவடிக்கையிலிருந்து தப்ப திவாகரன் தலைமறைவாக உள்ள நிலையில், மறுபக்கம் ராவணன் கைது செய்யப்பட்டிருப்பதாக வெளியாகியுளள தகவல் சசிகலா தரப்பில் பெரும் அதிர்ச்சி அலைகளை ஏற்படுத்தியுள்ளது.

நெடுந்தீவில் வீடுகள் கையளிப்பு! இப்பகுதி பல்வேறு அபிவிருத்திகளைக் காணுமென அமைச்சர் நம்பிக்கை!

2012-01-27T11:50:00.000-08:00

யாழ் தீவகம் நெடுந்தீவின் அபிவிருத்தி மற்றும் மேம்பாடு தொடர்பில் பாரம்பரிய கைத்தொழில்கள் மற்றும் சிறுதொழில் முயற்சி அபிவிருத்தி அமைச்சர் டக்ளஸ் தேவானந்தா அவர்களும் வடமாகாண ஆளுநர் ஜி.ஏ. சந்திரசிறி அவர்களும் நெடுந்தீவின் பல்வேறு பகுதிகளுக்கு விஜயம் மேற்கொண்டு துறைசார்ந்த அதிகாரிகளுடன் கலந்துரையாடி அது தொடர்பில் ஆராய்ந்தறிந்துள்ளனர். (படங்கள் இணைக்கப்பட்டுள்ளன
நெடுந்தீவுக்கு இன்றைய தினம் (26) விஜயத்தை மேற்கொண்ட அமைச்சர் மற்றும் ஆளுநர் அங்கு முன்னெடுக்கப்பட்ட மற்றும் முன்னெடுக்கப்பட வேண்டிய பல்வேறு அபிவிருத்தித் திட்டங்கள் தொடர்பில் ஆராய்ந்துள்ளனர். இதன் பிரகாரம் கீழ் தீவகத்தில் கோடைக் காலத்தில் நிலவும் நீர்த் தட்டுப்பாட்டை கருத்தில்கொண்டு வடக்கின் வசந்தம் திட்டத்தின் கீழ் புனரமைக்கப்பட்ட வெட்டுக்களிக் குளத்தைப் பார்வையிட்ட அமைச்சர் ஆளுநர் உள்ளிட்ட குழுவினர் அதன் சாதக பாதக நிலைவரங்கள் தொடர்பாக துறைசார்ந்தோரிடம் கேட்டறிந்து கொண்டனர். இப்புனரமைப்பு பணிகள் அமைச்சர் டக்ளஸ் தேவானந்தா அவர்களின் கோரிக்கைக்கு அமைய முன்னெடுக்கப்பட்டமை குறிப்பிடத்தக்கது. தொடர்ந்து நெடுந்தீவின் களாமுனைப் பகுதியில் சுற்றுலா மையம் அமைப்பது சாமிப்பிட்டிப் பகுதியில் சித்த மருத்துவ மூலிகையான கற்றாளை வளர்ப்புத் திட்டத்தை முன்னெடுப்பது தொடர்பில் ஆராய்ந்த அமைச்சர் அவர்கள் அதன் திட்ட வரைபை சமர்ப்பிக்குமாறும் துறைசார்ந்தோரிடம் பணிப்புரை விடுத்தார். இதனிடையே குறிகட்டுவானில் இருந்து நெடுந்தீவு கடற்போக்குவரத்தின் போது தாம் எதிர்நோக்கும் இடர்பாடுகள் தொடர்பில் படகோட்டுநர்கள் அமைச்சர் அவர்களிடம் எடுத்து விளக்கினர். இது விடயம்தொடர்பில் கடற்படை அதிகாரி ஊடாக தீர்வு காணமுடியுமென்றும் தெரிவித்ததுடன் நெடுந்தீவு தாளைத்துறைப் பகுதயை ஆழப்படுத்தித் தருமாறும் இதனூடாக தமது தொழில் இலகுவாக்கப்படலாம் என்றும் அப்பகுதி கடற்றொழிலாளர்கள் சுட்டிக் காட்டியபோது கோரிக்கைகள் தொடர்பில் துறைசார்ந்தோர் ஊடாக விரைவான நடவடிக்கை எடுக்கப்படுமென அமைச்சர் டக்ளஸ் தேவானந்தா அவர்கள் உறுதிமொழி வழங்கினார். அத்துடன் இந்திய மீனவர்களின் அத்துமீறிய தொழில் நடவடிக்கைக்கு இந்திய இலங்கை அரசுகள் மட்டுமல்ல இருதரப்பு கடற்றொழிலாளர்களுடன் கலந்துரையாடியே தீர்வு காணமுடியுமென ஜனாதிபதி தம்மிடம் தொலைபேசியில் கூறியிருந்ததையும் அமைச்சர் அவர்கள் இதன்போது சுட்டிக் காட்டியதுடன் இப்பிரச்சினைக்கு வரும் பங்குனி மாதத்திற்குள் முடிவு காணப்படும் என்றும் தெரிவித்தார். அத்துடன் கடற்படைப் பகுதியிலுள்ள வெளிச்ச வீட்டுக் கோபுரத்திற்கு உடனடியாக மின்விளக்கைப் பொருத்துமாறு கடற்படை அதிகாரியிடம் அமைச்சர் அவர்கள் இதன்போது தெரிவித்தார். இதனிடையே நெடுந்தீவு கிழக்கு சனசமூக நிலையத்தில் கடற்படையினரின் அனுசரணையில் இயங்கி வரும் தையல் கூடத்தை பார்வையிட்டதுடன் நெடுந்தீவு துறைமுகப் பகுதியில் வடக்கின் வசந்தம் திட்டத்தின் கீழ் வீதி அபிவிருத்தி அதிகார சபையால் ஆழமாக்கப்பட்ட பகுதியையும் புதிதாக அமைக்கப்பட்ட துறைமுகத்தையும் அமைச்சர் உள்ளிட்டோர் பார்வையிட்டனர். இதன்போது பிரதேச செயலர் சிறி வடமாகாண கடற்படை கட்டளைத் தளபதி அட்மிரல் ரவி விஜயகுணரட்ன நெடுந்தீவு பிரதேச சபைத் தலைவர் றெக்சியன் (ரஜீவ்) ஈ.பி.டி.பி.யின் யாழ் மாவட்ட அமைப்பாளர் கமலேந்திரன் (கமல்) உள்ளிட்ட துறைசார்ந்தோரும் உடனிருந்தனர்.

பொலிஸ் அதிகாரத்துக்கு தெரிவுக் குழு மூலமே விடை - கெஹெலிய

2012-01-27T09:56:00.001-08:00

காணப்பட வேண்டும் என்று அரசாங்கம் அறிவித்துள்ளது. அரசியலமைப்பில் இடம்பெற்றுள்ள அனைத்தையும் நாட்டில் நடைமுறைப்படுத்தினால் புதிய பிரச்சினைகளே உருவாகும். எனவே ஐக்கிய தேசியக் கட்சியும் ,தமிழ் தேசியக் கூட்டமைப்பும் ஜே.வி.பி. யும் விரைவில் பாராளுமன்ற தெரிவுக் குழுவில் பங்கேற்க வேண்டும் என்றும் அரசாங்கம் அழைப்பு விடுத்துள்ளது.
தகவல் திணைக்களத்தில் நடைபெற்ற அமைச்சரவைத் தீர்மானங்களை அறிவிக்கும் ஊடகவியலாளர் மாநாட்டில் அமைச்சரவையின் பேச்சாளரும் ஊடகத்துறை அமைச்சருமான கெஹெலிய ரம்புக்வெல கருத்துத் தெரிவிக்கையிலேயே மேற்கண்டவாறு கூறினார்.இங்கு அவர் மேலும் கூறியதாவது, இலங்கையின் இனப்பிரச்சினைக்கான தீர்வு தொடர்பில் அரசாங்கம் உறுதியானதும் கொள்கை ரீதியிலானதுமான நிலைப்பாட்டிலேயே உள்ளது. 13 ஆவது திருத்தச் சட்டத்திற்கு அப்பால் செல்லும் தீர்வுத் திட்டம் என்பது எல்லை மீறிய அதிகாரப் பகிர்வு அல்ல.செனற் சபை முறைமையினையே இது குறிப்பிடுகின்றது. செனற் சபை யோசனையினை இந்திய மத்திய அரசாங்கமும் எதிர்க்கட்சித் தலைவி சுஷ்மா சுவராஜும் ஏற்றுக் கொண்டுள்ளனர்.காணி அதிகாரங்களை வழங்குவதில் சிறு சிறு பிரச்சினைகளே உள்ளன. அதனைத் தீர்த்துக் கொள்ளக் கூடியதாக இருக்கும். ஆனால் பொலிஸ் அதிகாரம் என்பது பிரச்சினைக்குரிய விடயமாகவே உள்ளது. இதனை முழு அளவில் நடைமுறைப்படுத்த முடியாது. எவ்வாறாயினும் பாராளுமன்றத் தெரிவுக் குழு ஊடாகவே பொலிஸ் உள்ளிட்ட ஏனைய அதிகாரங்கள் தொடர்பில் பேசப்பட வேண்டும்.இந்தியாவின் ஆட்சி முறைமைகள் இலங்கைக்கு 100 வீதம் பொருந்தாது. அதேபோன்றுதான் ஏனைய நாடுகளின் நிர்வாக முறைமைகளுமாகும். வடக்கு, கிழக்கு மக்களுக்கா அல்லது அரசியல்வாதிகளுக்கா அதிகாரங்கள் தேவைப்படுகின்றன என்பது குறித்து தற்போது சிந்திக்கத் தோன்றுகின்றது. ஏனெனில் "திம்பு'' பேச்சுத் தொடக்கம் இன்றுவரை அதிகாரப் பகிர்வு தொடர்பாக பேசப்படுகின்றதே தவிர தமிழ் மக்களின் தேவைகள் கவனத்தில் கொள்ளப்படவில்லை.அரசியலமைப்பில் உள்ள விடயங்களே நாட்டில் பிரச்சினைகளைத் தோற்றுவிக்கும் என்றால் அதனை நடைமுறைப்படுத்த இயலாது. 13 ஆவது திருத்தச் சட்டத்தை முழு அளவில் நடைமுறைப்படுத்துவதிலும் இத்தகைய நிலையே காணப்படுகிறது.எவ்வாறாயினும் பாராளுமன்றத் தெரிவுக் குழுவில் அனைத்து அரசியல் கட்சிகளும் பங்கு பற்ற வேண்டும். இதில் தமிழ் தேசியக் கூட்டமைப்பின் பங்களிப்பு முக்கியமானதாகும்.

பிரித்தானிய விஸாவுக்கு போலி ஆவணங்கள் சமர்ப்பித்தவர் கைது

2012-01-27T09:05:00.000-08:00

ஐ க்கிய இராச்சிய விஸா பெறுவதற்காக போலி ஆவணங்களை சமர்ப்பித்த இலங்கையர் ஒருவர் ஜனவரி மாதம் 9ஆம் திகதி கைதுசெய்யப்பட்டுள்ளார்.
தான் பிரித்தானியாவில் தங்கியிருந்த காலத்தை மறைக்கும் வகையில் போலியான இலங்கை குடிவரவு முத்திரையைக் கொண்ட கடவுச்சீட்டை இவர் சமர்ப்பித்திருந்தார். இவரது விஸா விண்ணப்பம் மறுக்கப்பட்டதுடன், 10 வருடங்களுக்கு ஐக்கிய இராச்சியத்தினுள் நுழையத் தடை விதிக்கப்பட்டுள்ளது.பிரித்தானிய உயர்ஸ்தானிகராலயத்திலுள்ள ஐக்கிய இராச்சிய எல்லை முகவரக உத்தியோகத்தர்கள், போலியான குடிவரவு முத்திரைகளையும் விஸாக்களையும் கண்டுபிடிப்பதற்கு விசேட பயிற்சி வழங்கப்பட்டுள்ளனர் என ஐக்கிய இராச்சிய எல்லை முகவரக அதிகாரியான கிளேயர் மறே கூறினார்.

முறிகண்டிப் பிள்ளையார் கோவில் உரிமை மனு விசாரணை மே 29 இல் தமிழ்பேசும் நீதியரசர்கள் முன்னிலையில்

2012-01-27T08:48:00.001-08:00

முறிகண்டிப் பிள்ளையார் கோவில் நிர்வாக சர்ச்சை தொடர்பான அடிப்படை உரிமைமீறல் மனு மீதான உயர் நீதிமன்ற விசாரணையை தமிழ் பேசும் நீதியரசர்கள் மேற்கொள்ளவுள்ளனர்.இந்த மனு நேற்று (26) நீதியரசர்கள் சலீம் மார்சூப், கே.ஸ்ரீபவான் மற்றும் எஸ்.ஐ.இமாம் முன்னிலையில் எடுக்கப்பட்டது.
நீதிமன்றம் விசாரணையை மே மாதம் 29 ஆம் திகதிக்கு ஒத்திவைத்ததுடன், இந்த மனு தமிழ் பேசும் நீதியரசர்களான சலீம் மார்சூப், கே.ஸ்ரீபவான் மற்றும் எஸ்.ஐ.இமாம் ஆகியோரை உள்ளடக்கிய நீதிமன்றமே மேற்கொள்ளும் என முடிவு செய்தது.முறிகண்டி பிள்ளையார் கோவிலை தன்னிடம் திருப்பி ஒப்படைக்கக் கோரி அதன் பரம்பரைவழி தர்மகர்த்தா தாக்கல் செய்த அடிப்படை உரிமை மனுவை, உயர்நீதிமன்றம் ஏற்கனவே விசாரணைக்கு ஏற்றுக்கொண்டுவிட்டது.மனுதாரர் ஜி. மணிவண்ணன் தனது மனுவில் இந்து கலாச்சார அலுவல்கள் திணைக்களம் உட்பட 14 பேர்களை எதிர்மனுதாரர்களாக குறிப்பிட்டிருந்தார்.முறிகண்டி பிள்ளையார் கோவில், ஏ-9 கண்டி வீதியில் அமைத்துள்ள புராதன இந்துக் கோவிலாகும். 1990 ஆம் ஆண்டு, இந்தக் கோவிலை, விடுதலைப்புலிகள் தமது நிர்வாகத்தின் கீழ் கொண்டு வந்திருந்தனர்.விடுதலைப்புலிகள் இராணுவரீதியாக தோற்கடிக்கப்பட்;ட பின்னர், அதன் பரிபாலனத்தை இந்து கலாச்சார அலுவல்கள் திணைக்களம் நடத்திவருகிறது.மனுதாரர் சார்பில எம்.ஏ.சுமந்திரன் மற்றும் மோஹன் பாலேந்திரர் ஆஜரானார்கள். சட்ட மாஅதிபர் சார்பில் சிரேஷ்ட அரச சட்டத்தரணி ரஜிவ் குணதிலக்க ஆஜரானார். புதுக்குடியிருப்பு பிரதேச சபையின் சார்பில் ஏ.முத்துக்கிருஷ்ணன் ஆஜரானார்.

தமிழுக்குத் துரோகம் இழைத்துவிட்டோம் : அமைச்சர் டலஸ்

2012-01-27T08:16:00.000-08:00

சிங்கள மொழிக்கு முக்கியத்துவம் கொடுத்துத் தமிழ்மொழிக்குத் துரோகம் இழைத்து விட்டோம். இவ்வரலாற்றுத் தவறை நிகழ்காலத்திலும் செய்யக்கூடாது என்று அமைச்சர் டலஸ் அழகபெரும கூறினார்.
இளைஞர் அலுவல்கள் மற்றும் திறன் அபிவிருத்தி அமைச்சில் இன்று நடைபெற்ற நிகழ்வொன்றில் கலந்து கொண்டு உரையாற்றுகையிலேயே அமைச்சர் மேற்கண்டவாறு குறிப்பிட்டார். தொடர்ந்து கருத்துத் தெரிவித்த அவர்,"இலங்கையில் ஏனைய சிறுபான்மை இன மொழிகளுக்கும் சம அந்தஸ்து வழங்கப்பட்டிருக்க வேண்டும். அதுமட்டுமன்றி சர்வதேச மொழிகளுக்கும் முக்கியத்துவம் வழங்கப்பட்டிருக்க வேண்டும். அப்போதுதான் நவீன தொழில்நுட்ப வளர்ச்சிக்கு ஏற்ப உலகத்துடன் ஒன்றித்துப் பயணிக்க முடியும்" என்றார்.

களத்தில் இருக்கும் போது தகாத வாரத்தைகளால் திட்டுகின்றனர்: கோலி

2012-01-27T07:29:00.001-08:00

களத்தில் இருக்கும் போது அவுஸ்திரேலிய வீரர்கள் தகாத வார்த்தைகளால் திட்டியதாக இந்தியாவின் விராத் கோலி குற்றம்சாட்டியுள்ளார். இது குறித்து கோலி கூறுகையில்,
களத்தில் இருக்கும் போது அவுஸ்திரேலிய வீரர்கள் தொடர்ந்து தகாத வார்த்தைகளை பிரயோகிக்கின்றனர். இதன் மூலம் இந்திய துடுப்பாட்ட வீரர்களின் கவனத்தை சிதறடிக்கின்றனர். நான் 99 ஓட்டங்களை பெற்று இருந்த போது ரன் அவுட் வாய்ப்பில் இருந்து தப்பினேன். அப்போது ஹிலபெனாஸ் மோசமான வார்த்தைகளால் திட்டினார். இதை நாகரிகம் கருதி வெளியில் சொல்ல முடியாது. இதற்கு நானும் பதிலடி கொடுத்தேன். பின் பொண்டிங் தலையிட்டு சமாதானம் செய்து வைத்தார். நாங்கள் சர்வதேச கிரிக்கெட் வீரர்கள். போட்டியில் பங்கேற்க தான் அவுஸ்திரேலியா சென்றுள்ளோம்;. அவ்வீரர்களிடம் திட்டு வாங்குவதற்காக அல்ல. ரசிகர்களும் மோசமாக நடந்து கொள்கின்றனர். பதிலுக்கு நான் ஏதாவது செய்தால் (சிட்னி டெஸ்டில் நடுவிரலை காட்டியது) அபராதம் விதிக்கின்றனர்.முதல் சதம் அடித்த போது, மிகவும் மகிழ்ச்சியாக இருந்தது. இன்று விரைவாக ஆஸ்திரேலிய அணியின் விக்கெட்டை கைப்பற்றும் பட்சத்தில் இந்தியாவுக்கும் வெற்றி வாய்ப்பு உள்ளது என கோலி தெரிவித்துள்ளார்.

விபசார விடுதி நடத்த உதவிய தாய்லாந்து பெண்ணுக்கு அபராதம்

2012-01-27T07:17:00.000-08:00

கொள்ளுபிட்டி ஆர்.ஏ.டி. மெல் மாவத்தையில் விபசார விடுதியொன்றை நடத்த உதவிய குற்றச்சாட்டை ஒப்புக்கொண்ட தாய்லாந்து பெண்ணொருவருக்கு கொழும்பு கோட்டை நீதவான் கனிஷ்க விஜேரட்ன 50,000 ரூபா அபராதம் விதித்தார்.
பனிடா லிப்ட் எனும் இப்பெண் 06.08.2011 ஆம் திகதி கொள்ளுப்பிட்டி பெரிஸாரினால் கைதானார்.பொலிஸ் உத்தியோகஸ்தர் ஒருவர் மாறுவேடத்தில் சென்று இப்பெண்ணுக்காக 3000 ரூபாவை செலுத்தினார். அதன்பின் அப்பெண்ணும் மற்றும் பலரும் கைது செய்யப்பட்டனர்.இப்பெண்ணுக்கு நேற்று 50,000 ரூபா அபராதம் விதித்த நீதவான், ஏனைய சந்தேக நபர்களுக்கு எதிராக குற்றப்பத்திரத்தை தாக்கல் செய்யுமாறு பொலிஸாருக்கு உத்தரவிட்டார்.

பாகிஸ்தானில் துப்பாக்கிப் பிரயோகத்தால் சட்டத்தரணிகள் மூவர் பலி

2012-01-27T06:16:00.001-08:00

பாகிஸ்தானின் கராச்சி நகரில் ஆயுதபாணிகள் மேற்கொண்ட துப்பாக்கி பிரயோகத்தினால் சட்டத்தரணிகள் மூவர் உயிரிழந்துள்ளனர்.
நேற்று புதன்கிழமை இச்சம்பவம் இடம்பெற்றதாக பாகிஸ்தான் பொலிஸார் தெரிவித்துள்ளனர்.இச்சட்டத்தரணிகள் பயணம் செய்த கார் மீது மோட்டார் சைக்கிளில் வந்த ஆயுதபாணிகள் துப்பாக்கிப் பிரயோகம் செய்ததாக தெரிவிக்கப்படுகிறது.இறந்தவர்களில் இருவர் தந்தையும் மகனுமாவர் இந்த கொலைகளுக்கு பாகிஸ்தான் சட்டத்தரணிகள் சங்கம் கண்டனம் தெரிவித்துள்ளது.

ஐ.நா மனித உரிமைகள் ஆணையகத்திடம் நல்லிணக்க ஆணைக்குழு அறிக்கை சமர்ப்பிக்கப்படாது: ஜி.எல்.பீரிஸ்

2012-01-26T05:59:00.000-08:00

ஜனாதிபதி மஹிந்த ராஜபக்ஷவினால் நியமிக்கப்பட்ட கற்றுக்கொண்ட பாடங்கள் மற்றும் நல்லிணக்க ஆணைக்குழு அறிக்கையை இலங்கை ஐக்கிய நாடுகள் மனித உரிமைகள் ஆணையகத்திடம் சமர்ப்பிக்கமாட்டாது என வெளிவிவகார அமைச்சர் ஜி.எல்.பீரிஸ் தெரிவித்தார்.
எதிர்வரும் மார்ச் மாதம் நடைபெறவுள்ள ஐக்கிய நாடுகள் மனித உரிமைகள் ஆணையகத்தின் கூட்டத்தொடரில் நல்லிணக்க ஆணைக்குழுவின் அறிக்கை சமர்ப்பிக்கப்படுமா என ஊடகவியலாளரொருவர் இன்று வியாழக்கிழமை வெளிவிவகார அமைச்சில் நடைபெற்ற ஊடகவியலாளர் மாநாட்டில் வினவியதற்கே அமைச்சர் பீரிஸ் மேற்கண்டவாறு குறிப்பிட்டார்.அங்கு தொடர்ந்து கருத்து தெரிவித்த அவர்,நல்லிணக்க ஆணைக்குழுவின் அறிக்கையை ஐக்கிய நாடுகள் மனித உரிமைகள் ஆணையகத்திடம் சமர்ப்பிக்க வேண்டும் என்ற அவசியமில்லை. அத்துடன் அது தொடர்பிலான எந்த எண்ணமும் இலங்கை அரசுக்கில்லை.கற்றுக்கொண்ட பாடங்கள் மற்றும் நல்லிணக்க ஆணைக்குழு ஓர் உள்நாட்டு ஆணைக்குழுவாகும். குறித்த ஆணைக்குழுவின் அறிக்கை நாடாளுமன்றத்தில் கடந்த வருடமே சமர்ப்பிக்கப்பட்டுள்ளது.ஐக்கிய நாடுகள் மனித உரிமைகள் ஆணையகத்தின் கூட்டத்தொடர் மார்ச் மாதம் நடைபெறவுள்ளமையால் நல்லிணக்க ஆணைக்குழுவினால் முன்மொழியப்பட்ட சிபாரிசுகளை அரசாங்க அமுல்படுத்த சுமார் இரண்டு மாதங்கள் உள்ளன.இரண்டு நாள் உத்தியோகபூர்வ விஜயம் மேற்கொண்டு இலங்கை வந்துள்ள இந்தோனேஷிய வெளிவிவகார அமைச்சர் கலாநிதி மார்டி நட்டலெகவும் இந்த ஊடகவியலாளர் மாநாட்டில் கலந்துகொண்டார்.

த.ம.வி.பு கட்சியுடன் பேச்சு நடத்த தமிழ்த் தேசியக் கூட்டமைப்பு தீர்மானம்

2012-01-26T04:52:00.001-08:00

அதிகார பகிர்வு தொடர்பில் தமிழ் மக்கள் விடுதலை புலிகள் கட்சியுடன் தமிழ் தேசிய கூட்டமைப்பு விரைவில் பேச்சு நடத்தவுள்ளதாக தமிழ் தேசிய கூட்டமைப்பு தலைவர் இரா.சம்பந்தன் தெரிவித்தார்.
கிழக்கு மாகாண முதலமைச்சர் சிவனேசதுரை சந்திரகாந்தனுடன் அதிகார பகிர்வு தொடர்பில் பேச்சு நடத்துவதற்கு தமிழ் தேசிய கூட்டமைப்பு தீர்மானித்துள்ளதாக அவர் குறிப்பிட்டார்.'முதலமைச்சர் சந்திரகாந்தனால் பேச்சு நடத்துவது தொடர்பில் விடுக்கப்ட்ட வேண்டுகோளையடுத்து, தேசிய பிரச்சினை தொடர்பில் பேச்சு நடத்தி அரசியல் தீர்வு தொடர்பில் ஒர் இணக்கப்பாட்டுக்கு வர தீர்மானித்துள்ளோம்' என சம்பந்தன் தெரிவித்தார்.இப்பேச்சு தொடர்பிலான திகதி இதுவரை தீர்மானிக்கப்படவி;ல்லை. பேச்சுக்கான திகதியை தீர்மானிப்பது தொடர்பில் தமிழ் மக்கள் விடுதலை புலிகள் கட்சியினருடன் கலந்துரையாடல்கள் இடம்பெற்று வருவதாக அவர் குறிப்பிட்டார்.அதிகார பகிர்வு தொடர்பில் இணக்கப்பட்டுக்கு வருவதற்கும் பேச்சு நடத்த தமிழ் தேசிய கூட்டமைப்பின் தலைவர் இரா.சம்பந்தனுக்கு முதலமைச்சர் சந்திரகாந்தன் அண்மையில் அழைப்பு விடுத்திருந்தார்.வடக்கு கிழக்கு இணைப்பு தவிர்ந்த காணி மற்றும் காவல்துறை அதிகாரங்களை வழங்குவது தொடர்பில் தமிழ் மக்கள் விடுதலைப் புலிகள் கட்சியும் தங்களுடன் ஒருமித்த கருத்துடனேயே உள்ளோம் என தமிழ் தேசிய கூட்டமைப்பின் தலைவரான இரா.சம்பந்தனுக்கு கிழக்கு மாகாண முதலமைச்சரும் தமிழ் மக்கள் விடுதலைப் புலிகள் கட்சியின் தலைவருமான சி.சந்திரகாந்தன் அண்மையில் கடிதம் அனுப்பியிருந்தமை குறிப்பிடத்தக்கது.

மின்சார விநியோகம் தொடர்பில் விசேட கலந்துரையாடல்!

2012-01-25T12:52:00.000-08:00

யாழ்ப்பாணத்திற்கான மின் விநியோகத்தின் சீரமைப்பு தொடர்பில் விஷேட கலந்துரையாடலொன்று இன்று மாலை அமைச்சர் டக்ளஸ் தேவானந்தா அவர்களது தலைமையில் வடமாகாண ஆளுநர் அவர்களது செயலகத்தில் இடம்பெற்றது. (படங்கள் இணைக்கப்பட்டுள்ளன)
யாழ்ப்பாணத்திற்கான மின் விநியோகம் இலங்கை மின்சார சபை மற்றும் நோதர்சன் பவர் எக்றிகோ ஆகிய தனியார் நிறுவனங்கள் என்பன மூலம் தனித் தனியாக வழங்கப்பட்டு வருகின்ற நிலையில் இவற்றை ஒருங்கிணைத்து வழங்குவது தொடர்பில் இன்றைய தினம் ஆராயப்பட்டது. அதேபோன்று மண்டைதீவுக்கான மின் விநியோகத்தை உடனடியாக வழங்கவும் நடவடிக்கைகள் மேற்கொள்ளத் தீர்மானிக்கப்பட்டது. இக்கலந்துரையாடலின் போது வடமாகாண ஆளுநர் மேஜர் ஜெனரல் ஜி.ஏ. சந்திரசிறி இலங்கை மின்சார சபையின் பிராந்திய பொதுமுகாமையாளர் பிரியந்த குணதிலக்க உள்ளிட்டோர் கலந்து கொண்டனர்.

பொன்சேகாவின் வழக்கு தொடர்பில் கோரப்பட்ட விபரங்களை சட்டமா அதிபர் தரவில்லை : அ.நா.ஒ பிரதிநிதி

2012-01-25T12:44:00.001-08:00

முன்னாள் இராணுவ தளபதி சரத் பொன்சேகாவுக்கு எதிரான வழக்குகளை அவதானித்து வந்த, அனைத்து நாடாளுமன்ற ஒன்றியத்தின் (ஐ.பி.யு) பிரதிநிதியான மார்க் றொவெல்,'சட்டமா அதிபர் பல தடவை பேசிய போதும் தான் கேட்ட விடயங்களை தனக்கு தரவில்லை' என தனது அறிக்கையில் கூறியுள்ளார்.
அனைத்து நாடாளுமன்ற ஒன்றியத்தின் பிரதியாக சரத் பொன்சேகா மீதான வழக்குகளை அவதானிக்கவென அனுப்பி வைக்கப்பட்ட றொவல் அவுஸ்திரேலிய நாடாளுமன்ற உறுப்பினர் ஆவார். இவர் ஜுன் 6, 2011 இலிருந்து ஜுன் 11, 2011 வரை இலங்கையில் தங்கியிருந்தார். பொன்சேகாவின் வழக்குரைஞர்கள் தேவையான சகலதையும் தந்ததாக அவரது அறிக்கையில் குறிப்பிடப்பட்டுள்ளது.சிறையில் பொன்சேகாவின் நிலை பற்றி குறிப்பிடும்போது, ஒட்டுமொத்தமாக பார்க்கும்போது நிலைம திருப்தியாகவே உள்ளது. ஆனால் உண்டான முன்னேற்றம் ஒவ்வொன்றும் நீதிமன்றின் கட்டளையின் பேரிலேயே உண்டானது என அறிக்கையில் கூறப்பட்டுள்ளது.றொவலின் அறிக்கைப் பற்றி அச்சமயத்தில் சட்டமா அதிபராக கடமையாற்றிய மொறான் பீரிஸ் கருத்துக் கூற மறுத்துவிட்டார்.

கோவையில் அப்துல் கலாமின் கொடும்பாவி எரிப்பு: 12 சட்டக் கல்லூரி மாணவர்கள் கைது

2012-01-25T10:08:00.001-08:00

முன்னாள் குடியரசுத் தலைவர் டாக்டர் அப்துல் கலாமின் உருவ பொம்மையை எரித்த கோவை சட்டக் கல்லூரி மாணவர்கள் 12 பேரை போலீசார் கைது செய்தனர்.
கூடங்குளம் அணுமின் நிலையம் குறித்து மக்கள் மனதில் உள்ள அச்சங்களைப் போக்க முன்னாள் குடியரசுத் தலைவர் டாக்டர் அப்துல் கலாம் முயற்சி செய்து வருகிறார். அணுமின் நிலையத்தை பார்வையிட்ட அவர் அது மிகவும் பாதுகாப்பானது, அதனால் யாரும் கவலைப் பட வேண்டாம் என்று தெரிவித்திருந்தார்.மக்கள் கூடங்குளம் அணுமின் நிலையத்தின் பாதுகாப்பு குறித்து பயப்பட வேண்டாம் என்றும், இத்திட்டத்தின் மூலம் தமிழகத்தின் நிதி நிலைமை மேம்படும் என்றும் அவர் மேலும் தெரிவித்திருந்தார்.அவரது இந்த கருத்துக்கு எதிர்ப்பு தெரிவித்து கோவை சட்டக் கல்லூரி மாணவர்கள் 12 பேர் அப்துல் கலாமின் உருவ பொம்மையை ஊர்வலமாக எடுத்துச் சென்றனர். மாவட்ட கலெக்டர் அலுவலகத்திற்கு அவர்கள் வந்தபோது ஒரு மாணவன் கலாமின் உருவ பொம்மைக்கு தீ வைத்தார். அதை உடனே போலீசார் அணைத்துவிட்டு அந்த 12 மாணவர்களையும் கைது செய்தனர்.முன்னாள் குடியரசுத் தலைவர் அப்துல் கலாம் இதுவரை எந்த சர்ச்சையிலும் சிக்காமல் இருந்து வந்தார். அவருக்குப் போகும் இடமெல்லாம் சிறப்பாகவே இருந்து வருகிறது. இந்த நிலையில் அவரது கொடும்பாவி தமிழகத்தில் முதல்முறையாக, ஏன் இந்தியாவிலேயே முதல்முறையாக எரிக்கப்பட்டிருப்பது பரபரப்பை ஏற்படுத்தியுள்ளது.

முக்கோண தொடருக்கான இலங்கை அணி அறிவிப்பு: இலங்கை அணியில் மஹ்ரூப், சானக்க

2012-01-25T09:23:00.001-08:00

இ லங்கை இந்தியா மற்றும் அவுஸ்திரேலிய அணிகள் பங்கேற்கும் முக்கோண ஒரு நாள் கிரிக்கெட் தொடருக்கான இலங்கை அணி நேற்று அறிவிக்கப்பட்டது. நீண்ட காலத்திற்கு பிறகு இலங்கை அணியில் பர்வீஸ் மஹ்ரூப், சானக்க வெலகெதர ஆகியோர் இடம்பெற்றுள்ளனர்.
சகலதுறை வீரர் பர்வீஸ் மஹ்ரூப் மற்றும் சானக்க வெககெதர ஆகியோர் கடந்த 2010 ஆம் ஆண்டு ஜீன் மாதத்திற்கு பிறகு இலங்கை அணியின் ஒரு நாள் போட்டித் தொடர்களில் இடம்பெறவில்லை.தென்னாபிரிகாவுடனான ஒரு நாள் தொடரில் இலங்கை அணி தோற்றதன் பின்னர் டில்சான் அணித் தலைவர் பதவியிலிருந்து இராஜினாமா செய்தார். இதனையடுத்து அணியின் தலைவராக மஹேல ஜயவர்தன நியமிக்கப்பட்டதோடு தொடர்ந்து அணியின் உபதலைவராக எஞ்சலோ மெத்தியூஸ் செயற்படுவார்.இம் மூன்று அணிகளும் பங்கேற்கும் முக்கோண ஒருநாள் தொடர் எதிர்வரும் பெப்ரவரி 5 ஆம் திகதி தொடக்கம் மார்ச் 8 ஆம் திகதி வரை நடைபெற உள்ளது. இலங்கை அணியின் விபரம்: மஹேல ஜயவர்தன (தலைவர்), எஞ்சலோ மெத்தியூஸ் (உபதலைவர்), உபுல் தரங்க, திலகரட்ன டில்ஷான், குமார் சங்கக்கார (விக்கெட் காப்பாளர்), தினேஷ் சந்திமால் லஹிரு திரிமாண்ன, திசேர பெரேரா, பர்வீஸ் மஹ்ரூப், சானக வெலகெதர, ரங்கன ஹேரத், லஷித் மாலிங்க, நுவான் குலசேகர, சச்சித்ர சேனநாயக்க, தம்மிக பிரசாத்.

43 இந்திய மீனவர்கள் இலங்கை கடற்படையினரால் கைது

2012-01-25T08:33:00.001-08:00

திருகோணமலை புல்மோட்டைக்கு வடக்கிலுள்ள கடற்பரப்பில் மீன்பிடித்த குற்றச்சாட்டில் 43 இந்திய மீனவர்களை இலங்கை கடற்படையினர் நேற்று இரவு கைது செய்துள்ளதாக கடற்படை பேச்சாளர் கோசல வர்ணகுலசூரிய தெரிவித்தார்.
இம்மீனவர்களின் 6 படகுகளும் கடற்படையினரால் கைப்பற்றப்பட்டு திருகோணமலை துறைமுகத்துக்கு கொண்டுவரப்பட்டுள்ளன எனவும் அவர் கூறினார். இம்மீனவர்கள் பொலிஸாரிடம்ஒப்படைக்கப்பட்டுள்ளனர்

இலங்கையரான முன்னாள் காதலியை கத்தியால் குத்தியதாக இந்தியர் மீது துபாயில் வழக்கு

2012-01-25T07:50:00.001-08:00

இலங்கையைச் சேர்ந்த தனது முன்னாள் காதலியை கத்தியால் குத்தி கொலை செய்யமுயன்ற குற்றச்சாட்டுக்குள்ளான இந்தியாவைச் சேர்ந்த தனியார் பாதுகாப்பு உத்தியோகஸ்தர் ஒருவர் துபாய் நீதிமன்ற தீர்ப்பை எதிர்பார்த்துள்ளார்.
ஜே.கே.கே. என குறிப்பிடப்படும் 32 வயதான இந்நபர், தனது காதலியை தாக்குவதற்கு முன்னர் டிடிரி மருந்தை உட்கொண்டதாக துபாய் சுகாதார அதிகார சபை தெரிவித்துள்ளது.துபாய் குற்றவியல் நீதிமன்றில் நீதிபதி சயீட் மொஹமட் புர்குத் முன்னிலையில் இவ்வழக்கு நேற்று விசாரிக்கப்பட்டபோது ஜே.கே.கே. தன்மீதான குற்றச்சாட்டை நிராகரித்தார்.40 வயதான என்.பி.ஏ. என குறிப்பிடப்படும் பெண்ணையே இவர் கத்தியால் 3 தடவை குத்தியதாக குற்றம் சுமத்தப்பட்டுள்ளது.இது தொடர்பாக அப்பெண் சாட்சியமளிக்கையில், '6-7 மாதங்களுக்கு நான் அவரின் காதலை நிராகரித்து, திருமணம் செய்ய மறுத்ததால் அவர் என்னை பழிவாங்க முற்படுகிறார். அப்போதிருந்து என்னை கொன்றுவிட்டு அவர் தற்கொலை செய்துகொள்ளப்போவதாக அச்சுறுத்தி வருகிறார்' எனக் கூறியுள்ளார்.இப்பெண்ணை ஜே.கே.கே. அருகிலுள்ள சுப்பர் மார்கெட் ஒன்றில் அல்லது பஸ் நிலையத்தில் சந்திப்பதை வழக்கமாக கொண்டிருந்ததாகவும் அங்கு வைத்து அப்பெண்ணை அச்சுறுத்தியதாகவும் குற்றம் சுமத்தப்பட்டுள்ளது.'உன்னை கொல்வேன். உனது வாழ்க்கை முடிவுக் வரவேண்டும்' என ஜே.கே.கே. கூறினாராம்.அல் நஹ்டா-1 பகுதியிலுள்ள ஷராவ் அல் டீன் கட்டிடத்திலுள்ள அப்பெண்ணின் எஜமானரின் வீட்டில் இரவு 11.30 மணியளவில் வந்து அப்பெண்ணை ஜே.கே.கே. கத்தியால் குத்தியதாக தெரிவிக்கப்படுகிறது.எஜமானரின் தாயார் வசிக்கும் அருகிலுள்ள வீடொன்றில் தான் உறங்கச் செல்லவிருந்தாகவும், கதவை திறந்தபோது ஜே.கே.கே. தன்னுடன் மோதி தன்னை வயிற்றிலும் கையிலும் கத்தியால் குத்தியாகவும் அப்பெண் தெரிவித்துள்ளார்.தான் பலம்கொண்டமட்டும் கத்தியை பிடித்துக்கொண்டு உயிருக்குப் போராடி கூக்குரலிட்டதாகவம் பின்னர் கட்டிடத்தின் 8 ஆவது தளத்தில் வசித்தவர்கள் வெளியில் வந்து இதில் தலையிட்டதாகவும் அப்பெண் தெரிவித்துள்ளார்.இதேவேளை, விசாரணையின்போது, என்.பி.ஏ. வை திருமணம் செய்வதற்காக தான் ஏற்கெனவே இந்து மதத்திலிருந்து இஸ்லாத்திற்கு மாறியுள்ளதாக ஜே.கே.கே. தெரிவித்தார்' என மேஜர் சுஹைல் கூறியுள்ளார்.

நாங்கள் ஐ.தே.க.விலிருந்து பிரிந்தவர்கள் அல்லர்: சஜித்

2012-01-25T07:18:00.001-08:00

நாங்கள் ஐக்கிய தேசியக் கட்சியிலிருந்து பிரிந்தவர்கள் அல்லர்' என ஐக்கிய தேசியக் கட்சியின் பிரதித் தலைவர் சஜித் பிரேமதாச தெரிவித்துள்ளார்.
'நாங்கள் எப்பொழுதும் கட்சியுடன் இருப்போம். ஐக்கிய தேசியக் கட்சியுடன் நாங்கள் இருந்து வந்துள்ளோம்' என ஊடகவியலாளர்கள் சந்திப்பில் அவர் கூறினார்.'நாம் சகல பிரிவினரையும் இணைத்து ஒரு விசாலமான கூட்டணி அமைத்து இந்த அரசாங்கத்தை எதிர்கொள்வோம்' என சஜித் பிரேமதாச தெரிவித்துள்ளார்.

தாய்லாந்துக்கு தப்பித்து செல்ல முயன்ற இலங்கையர் கைது

2012-01-25T07:02:00.001-08:00

ம லேசியாவின் சுங்கம், குடிவரவு மற்றும் தொற்றுநோய் ஒதுக்கிடப் பிரிவில் இருந்து தப்பிச் செல்ல முயற்சித்த இலங்கை பிரஜை ஒருவர் கைது செய்யப்பட்டுள்ளார்.
கடந்த ஞாயிற்றுக்கிழமை மாலை இவர் கைது செய்யப்பட்டுள்ளதாக மலேசிய ஊடகங்கள் தெரிவித்துள்ளன.உள்நாட்டில் உள்ள கார் ஒன்றில் வைத்து 30 வயது மதிக்கத்தக்க இலங்கையர் கைது செய்யப்பட்டுள்ளார். இவரிடம் போலி மலேசிய கடவுச்சீட்டு இருந்ததாகவும் மலேசியா ஊடாக தாய்லாந்துக்கு தப்பிச்செல்ல இவர் முயற்சித்ததாகவும் மலேசிய செய்திகள் தெரிவிக்கின்றன.

மஹிந்த சிந்தனை இரண்டு பாரிய சவால்களை எதிர்நோக்கும்: அஜித் கப்ரால்

2012-01-25T06:39:00.001-08:00

மஹிந்த சிந்தனை அடுத்த சில வருடங்களில் இரண்டு பாரிய சவால்களை எதிர்நோக்கும் என இலங்கை மத்திய வங்கியின் ஆளுநர் அஜித் நிவாட் கப்ரால் தெரிவித்தார்.
நிலையான அபிவிருத்தியை மேற்கொள்ளல் மற்றும் அனைத்து மக்களும் சம அளவிலான அபிருத்திகளை மேற்கொள்ளல் ஆகியனவே மேற்படி இரண்டு சவால்களாகும் என அவர் குறிப்பிட்டார்.சர்வதேச உறவுகள் மற்றும் தந்திரோபாய கற்கைகளுக்கான லக்ஷ்மன் கதிர்காமர் நிலையத்தினால் நல்லிணக்கத்திற்கான தேசிய மாநாடு (பகுதி – 2) நேற்று செவ்வாய்க்கிழமை கொழும்பில் நடைபெற்றது.இம்மாநாட்டில் "நல்லிணக்கத்தில் வர்த்தக சமூகத்தில் பங்கு" எனும் தொனிப்பொருளில் சிறப்புரையாற்றும் போதே அஜித் நிவாட் கப்ரால் மேற்கண்டவாறு குறிப்பிட்டார்.அங்கு தொடர்ந்து உரையாற்றி அவர்,இலங்கையை அபிவிருத்தி செய்தவதற்கு வர்த்தக சமூகத்துடன் இணைந்து செயற்பட வேண்டிய அவசியமுள்ளது. இதற்காக அரசாங்கம் தயார உள்ளது.இதேபோன்று வடக்கு மற்றும் கிழக்கு மாகாணங்களில் அரச மற்றும் தனியார் வங்கிகள் திறக்கப்பட்டு கடன்கள் வழங்கப்பட்டு வருகின்றன. இக்கடன்கள் மூலம் முன்னாள் போராளிகள் உள்ளிட்ட பலர் சுயதொழில் நடவடிக்கையில் ஈடுபட்டு வருகின்றனர்.இந்த கடன் திட்டங்களை கண்கானிப்பதற்காக பிரிவொன்று மத்திய வங்கியினால் உருவாக்கப்பட்டுள்ளது.யுத்தத்திற்கு பின்னர் வடக்கு மற்றும் கிழக்கு மாகாணங்களில் உட்கட்டமைப்பு உள்ளிட்ட பல்வேறு அபிவித்தி செயற்பாடுகள் இடம்பெற்று வருகின்றன.2006ஆம் ஆண்டு தொடக்கம் 2009ஆம் ஆண்டு வரை இடம்பெற்ற யுத்ததிற்காக இலங்கை அரசாங்கம் சுமார் 5.5 பில்லியன் அமெரிக்க டொலரையே செலவளித்துள்ளது. இது மொத்த தேசிய உற்பத்தில் 4 சதவீதமேயாகும். ஏனைய பல நாடுகள் இதனை விட அதிக பணத்தையே செலவளித்துள்ளது.இதேவேளை, குறித்த கால பகுதியில் ஈராகில் இடம்பெற்ற யுத்த நடவடிக்கைக்கு அமெரிக்கா 683 பில்லியன் அமெரிக்க டொலரையும் பயிற்சி நடவடிக்கைக்காக 23.2 பில்லியன் அமெரிக்க டொலரையும் செலவளித்துள்ளது.இதேபோன்று ஆப்கானிஸ்தானில் இடம்பெற்ற யுத்த நடவடிக்கைக்கு அமெரிக்கா 227 பில்லியன் அமெரிக்க டொலரையும் பயிற்சி நடவடிக்கைக்காக 15.8 பில்லியன் அமெரிக்க டொலரையும் செலவளித்துள்ளது.குறித்த கால பகுதியில் ஆப்கானிஸ்தானில் இடம்பெற்ற யுத்த நடவடிக்கைக்கு அமெரிக்கா செலவளித்த நிதியில் 14 சதவீதத்தையே இலங்கை செலவளித்துள்ளது என்றார்.இங்கு உரையாற்றிய பேராசிரியர் ரோஹான் குணரட்ன,நல்லிணக்கத்தை ஒரு சமூக பொறுப்புடமையாக வர்த்தக நிறுவனங்கள் கருத வேண்டும். இதன் மூலம் வர்த்த நிறுவனங்கள் சமூகத்திற்கு பல சேவைகளை வழங்க முடியும்.வட மாகாண அபிவிருத்திக்காக அரசாங்கத்துடன் வர்த்த நிறுவனங்களும் இணைந்து செயற்படுகின்றன. 53 முன்னாள் போரளி ஜோடிகளுக்கான திருமண வைபவம் சில வருடங்களுக்கு முன்னர் இடம்பெற்றது.இவர்களுக்கான தாலி கொடி மற்றும் திருமண ஏற்பாடுகளை ஈஸ்வரன் எனும் ஒரு வர்த்தகரே மேற்கொண்டார். இதனையடுத்து குறித்த குடும்பத்தினர் இன்று சுயதொழிலில் ஈடுபட்டு வருகின்றனர்.இதன் போன்று ஏனைய வர்த்தக நிறுவனங்களும் அபிவிருத்தி மற்றும் நல்லிணக்க செயற்பாடுகளுக்கு உதவ வேண்டும்.யுத்த காலத்தில் விடுதலை புலிகள் அரசியல் தலைவர்கள் படை அதிகாரிகள் மற்றும் வர்த்த நிறுவனங்கள் ஆகியவற்றின் மீதே தாக்குதல் நடத்தினர்.இதில் முதலாவது இடம்பெற்ற தாக்குதல் 1986ஆம் ஆண்டு மே மாதம் 30ஆம் திகதி எலிபன்ட ஹவுஸ் மீது மேற்கொள்ளப்பட்டதாகும். இதனை தொடர்ந்து உலக வர்த்தக மையயம், மத்திய வங்கி, கட்டுநாயக்க சர்வதேச விமதான நிலையம் உள்ளிட்ட பலவற்றின் மீது தாக்குதல் மேற்கொண்டனர்.வர்த்த நிறுவனங்கள் மீது தாக்குதல் மேற்கொண்டால் இலங்கை அரசை பாரியளவில் பின்னடைய செய்யலாம் என்பதனாலே வர்த்த நிறுவனங்கள் மீது தாக்குதல் மேற்கொள்வதாக விடுதலை புலிகளின் முக்கிய தளபதி பொட்டு அம்மான் குறிப்பிட்டிருந்தார்.அரசாங்கம் வடக்கு மற்றும் கிழக்கு மாகாணங்களிலேயே விடுதலை புலிகளுக்கு எதிராக போராடியது. ஆனால் விடுதலை புலிகள் வடக்கு மற்றும் கிழக்கு மாகாணங்களுக்கு வெளியே வர்த்த நிறுவனங்கள் மீது தாக்குதல் மேற்கொண்டு அரசாங்கத்தை அச்சுறுத்தினர் என குறிப்பிட்டார்.இங்கு உரையாற்றி யாழ். மாவட்ட செயலாளர் இமெல்டா சுகுமார்,யாழ். மாவட்டத்தில் முதலீட்டாளர்களுக்கு பாதுகாப்பான சுழல் தற்போது காணப்படுகிறது. இதனால் முதலீட்டாளர்கள் யாழ். மாவட்டத்தில் வர்த்த நடவடிக்கை ஈடுபடுவதற்கு வருமாறு அழைப்பு விடுத்தார்.யாழ். மாவட்டத்திலுள்ள கண்ணிவெடியினை அகற்றுவதற்கு 10 வருடங்கள் தேவை என இராணுவத்தினர் மற்றும் கண்ணிவெடி அகற்றும் தொண்டு நிறுவனங்கள் தெரிவித்தன.ஆனால், சுமார் இரண்டு வருடங்களுக்குள்ளேளே கண்ணிவெடி அகற்றும் நடவடிக்கை யாழ். மாவட்டத்தில் நிறைவடைந்தது.இதனையடுத்து யாழ். மாவட்டத்தில் காணப்பட்ட அனைத்து அதியுயர் பாதுகாப்பு வலயங்களும் அகற்றப்பட்டுள்ளது. குறித்த பாதுகாப்பு வலயங்கள் அகற்றப்பட்டவுடன் மக்கள் மீள்குடிறேறப்படுகின்றனர். இவர்களுக்கு தேவையான அடிப்படை வசதிகளை மேற்கொண்டு வருகின்றோம்.அடிப்படை வசதியின்றி மக்களை குடியேற்ற யாழ். பாதுகாப்பு படைகளின் கட்டளை தளபதி அனுமதிக்கமாட்டார். யாழ். மாவட்டத்தின் சனத்தொகை தற்போது அதிகரித்து வருகின்றது. இதற்கு பிரதான காரணம் என்னவென்றால் வெளிநாடுகளிலிருந்து மீண்டும் நாடு திரும்புவதேயாகும்.யாழ். மாவட்ட செயலகம் மத்திய அரசாங்கத்துடன் மாகாண சபையுடனும் இணைந்து அபிவிருத்தி நடவடிக்கைகளை மேற்கொள்கின்றது.2011 தொடக்கம் 2013ஆம் ஆண்டு வரையான கால பகுதியில் யாழ். மாவட்டத்தில் அபிவிருத்தி செயற்பாடுகளை மேற்கொள்வதற்காக 251, 583 மில்லியன் ரூபா நிதியினை பொருளாதார அபிவித்தி அமைச்சு ஒதுக்கியுள்ளது.புகையிரத பாதை அபிவிருத்தி மற்றும் வீடமைப்பு திட்டங்களுக்கு மேலதிகமாகவே இந்நிதி ஒதுக்கப்பட்டுள்ளது என குறிப்பிட்டார்.

சிறந்த கொள்கையும் திட்டமும் எம்மிடமே இருக்கின்றன! அமைச்சர் டக்ளஸ் தேவானந்தா

2012-01-24T11:38:00.000-08:00

அரசியல் தீர்வு விடயத்தில் எம்மிடம் தெளிவான கொள்கையும் திட்டமும் இருக்கின்றது என ஈழ மக்கள் ஜனநாயகக் கட்சியின் செயலாளர் நாயகமும் பாரம்பரிய கைத்தொழில்கள் மற்றும் சிறுதொழில் முயற்சி அபிவிருத்தி அமைச்சருமான டக்ளஸ் தேவானந்தா அவர்கள் தெரிவித்துள்ளார். (படங்கள் இணைக்கப்பட்டுள்ளன)
யாழ் வீரசிங்கம் மண்டபத்தில் இன்றைய தினம் (24) இடம்பெற்ற வன்னித் தொண்டர் ஆசிரியர்களுடனான கலந்துரையாடலின் போதே அவர் இவ்வாறு தெரிவித்தார். அவர் மேலும் தெரிவிக்கையில் நியாயமான தேவையின் அடிப்படையில்தான் உங்களுக்கு நியமனங்கள் வழங்குவது தொடர்பில் நாம் மிகுந்த அக்கறை கொண்டுள்ளோம். நாடளாவிய ரீதியில் அபிவிருத்தி திட்டங்கள் முன்னெடுக்கப்பட்டு வரும் நிலையில் வடபகுதியில் பல்வேறு அபிவிருத்திகளுக்காக அரசு அதிகளவான நிதியை ஒதுக்கீடு செய்துள்ளது. கடந்த கால தவறான அரசியல் வழிநடத்தல் காரணமாகவே எமது மக்கள் ஈடுசெய்ய முடியாத இழப்பையும், அழிவையும் சந்தித்திருந்தனர் என்பதுடன் அவ்வாறான அரசியல்வாதிகளிடம் இன்றும் கூட சிறந்த கொள்கையோ திட்டமோ இல்லை என்று கூறிய அமைச்சர் அவர்கள் அரசியல் தீர்வு விடயத்தில் எம்மிடம் ஒரே நிலைப்பாடான தெளிவான கொள்கையும் திட்டமும் இருக்கின்றது என்றும் சுட்டிக் காட்டினார். அதேநேரம் தொழிலுக்காக மட்டுமல்லாமல் சமூகத்தின் மேம்பாட்டுக்காகவும் அபிவிருத்திக்காகவும் உழைக்க வேண்டியது ஆசிரியர்களின் கடமை என்பதுடன் அதற்கமைவாக உங்களது திறமைகளை மேலும் வளப்படுத்தி எதிர்காலத்தில் வளமானதொரு கல்விச் சமுதாயத்தை வளர்த்தெடுப்பதற்கு எல்லோரும் ஒன்றிணைந்து உழைக்க வேண்டுமெனவும் கேட்டுக் கொண்டார். அத்துடன் இன்றைய சூழலைப் பாதுகாத்துக் கொண்டு அதனை வளர்த்தெடுத்து அதிலிருந்து முன்னேறுவதே சிறந்த வழிமுறையாகும் என்றும் சுட்டிக்காட்டினார். அடுத்த சந்திப்பின் போது தொண்டர் ஆசிரியர்களின் நியமனம் தொடர்பில் நிச்சயம் சாதகமான பதில் தரப்படுமெனவும் அதுவரையில் நம்பிக்கையுடன் கடமையாற்றுமாறும் பலத்த கைதட்டலுக்கு மத்தியில் அமைச்சர் அவர்கள் உறுதிபடத் தெரிவித்தார். அங்கு உரையாற்றிய ஈ.பி.டி.பி. பாராளுமன்ற உறுப்பினரும் பாராளுமன்றக் குழுக்களின் பிரதித் தலைவருமான முருகேசு சந்திரகுமார் அவர்கள் வன்னி மாவட்டங்களில் பல தொண்டர் ஆசிரியர்கள் நீண்டகாலமாக பணியாற்றி வருகின்றனர். வாழ்வாதாரத்துக்கு ஏற்ற வேதனங்களை பெற முடியாதிருந்த போதும் அவர்கள் தொடர்ந்து பணியாற்றி வருகின்றமை போற்றுதற்குரியது. இந்நிலையில் கடந்த காலங்களில் வடமாகாண தொண்டர் ஆசிரியர்களுக்கு நியமனம் வழங்கப்பட்ட போது வன்னி பிரதேசத்தில் கடும் யுத்தம் நிலவிவந்ததால் அவர்கள் நியமனம் பெறமுடியாது போனதையிட்டு நாம் மனம் வருந்துகின்றோம். ஆனால் யுத்தம் முடிவுக்கு கொண்டு வரப்பட்டதைத் தொடர்ந்து நிலவிவரும் இயல்புச் சூழலில் தொண்டர் ஆசிரியர்களுக்கு நிரந்தர நியமனம் வழங்கப்பட வேண்டுமென கோரிக்கைகள் முன்வைக்கப்பட்டன. அதற்கமைவாக அமைச்சர் டக்ளஸ் தேவானந்தா அவர்களிடம் பலர் இக்கோரிக்கைகளை முன்வைத்தனர். அதற்கான நடவடிக்கைகளையும் அமைச்சர் அவர்கள் மேற்கொண்டார். இதற்கான சாதகமான தீர்வினை அரசாங்கத்திடமிருந்து மிக மதிநுட்பமான அரசியல் அணுகுமுறையினூடாகவே பெறவேண்டிய கள யதார்த்தம் எமது பகுதிகளில் நிலவி வருகின்றது. அதாவது இன்று வடமாகாணத்தில் உள்ள மாணவர்கள் எண்ணிக்கையுடன் நோக்குகையில் மேலதிகமான ஆசிரியர் வளத்தினையே எமது பகுதிகள் கொண்டுள்ளன. இருப்பினும் அந்தந்த பகுதி ஆசிரியர்கள் உச்சபயனை அடைவார்கள் என்ற நியாயத்தின் அடிப்படையிலேயே நாம் அரசாங்கத்திடம் இவர்களுக்கு நிரந்தர நியமனம் வழங்கப்பட வேண்டுமென்ற கோரிக்கையை முன்வைத்தோம். அத்தோடு இவர்களுக்கு நியாயமாக கிடைக்க வேண்டிய நியமனம் என்ற கருத்தை நாம் வலியுறுத்தினோhம். இவற்றை அமைச்சர் டக்ளஸ் தேவானந்தா அவர்கள் ஜனாதிபதியின் கவனத்திற்கு கொண்டு வந்ததாக பாராளுமன்ற உறுப்பினர் சந்திரகுமார் அவர்கள் மேலும் தெரிவித்தார். இதேவேளை இங்கு உரையாற்றிய வடமாகாண ஆளுநரின் செயலாளர் இளங்கோவன் தொண்டர் ஆசிரியர்களின் நியமனம் தொடர்பாக அமைச்சர் டக்ளஸ் தேவானந்தா அவர்களும் பாராளுமன்ற உறுப்பினர் சந்திரகுமார் அவர்களும் வடமாகாண ஆளுநர் ஜி.ஏ. சந்திரசிறி அவர்களும் பல முயற்சிகளை மேற்கொண்டனர். அதன் விளைவாகவே இன்று நியமனம் வழங்கப்பட வேண்டும் என்ற தீர்மானம் எட்டப்பட்டுள்ளது எனக் குறிப்பிட்டார். நிகழ்வில் வன்னித் தொண்டர் ஆசிரியர் சங்கத்தின் 05 வலயங்களைச் சேர்ந்த பிரதிநிதிகள் உரையாற்றும் போது தொண்டர் ஆசிரியர்களின் நியமனங்கள் மட்டுமல்லாமல் வடபகுதி மக்களது அபிவிருத்தி மேம்பாட்டுக்காகவும் தொடர்ந்தும் உழைத்துக் கொண்டிருப்பவர் அமைச்சர் டக்ளஸ் தேவானந்தா அவர்கள் என்றும் ஏனைய அரசியல்வாதிகள் பொய் வாக்குறுதிகளை வழங்கி ஏமாற்றி வருகின்ற போதிலும் சொன்னதையே செய்பவராகவும் செய்வதையே சொல்பவராகவும் மக்களுக்கான பணிகளை முன்னெடுத்து வருபவர் அமைச்சர் மட்டுமே என்றும் சுட்டிக் காட்டினர். இதன்போது வடமாகாண ஆளுநரின் செயலாளர் இளங்கோவன் கல்வித் துறைசார்ந்தோரும் கிளிநொச்சி முல்லைத்தீவு துணுக்காய் மடுவலயம் வடமராட்சி கிழக்கு கல்வி வலயத்தைச் சேர்ந்த 500க்கும் அதிகமான தொண்டர் ஆசிரியர்களும் கலந்து கொண்டனர்.

தலைமைச் செயலகத்தில் உலவும் 3 'ஒற்றர்கள்': 'அம்மா'வுக்கு தெரியுமா?

2012-01-24T10:42:00.001-08:00

தமிழக அரசின் பல்வேறு முக்கிய முடிவுகளில் சொதப்பல்கள், குழப்பங்கள் ஏற்படுவதற்கு அதுதொடர்பான முக்கியத் தகவல்கள் வெளியில் முன்கூட்டியே கசிவதுதான் என்று கோட்டை வட்டாரத்தில் பேச்சு அடிபடுகிறது.
இந்த முக்கியத் தகவல்களை தலைமைச் செயலகத்தில் முக்கியப் பொறுப்பில் உள்ள மூன்று முக்கிய அதிகாரிகள்தான் லீக் செய்கிறார்கள் என்றும் பரபரப்பாக கிசுகிசுக்கப்படுகிறது.'வ, பெ மற்றும் அ' என்ற எழுத்துக்களில் ஆரம்பிக்கும் பெயர் கொண்ட இந்த மூன்று முக்கிய அதிகாரிகள்தான் பல முக்கியத் தகவல்களை வெளியில், அதாவது ஒரு முக்கிய கட்சியின் தலைமைக்கு லீக் செய்வதாகவும் கூறுகிறார்கள் கோட்டை வட்டாரத்தினர். இந்த மும்மூர்த்திகளில் இருவர் பெண் அதிகாரிகள் என்பது குறிப்பிடத்தக்கது.இந்த மூன்று பேரும்தான், அமைச்சர்கள், அதிகாரிகளுக்கு பி.ஏக்கள், கார் டிரைவர்கள் உள்ளிட்டோரை நியமிக்கும் பொறுப்பில் இருப்பவர்களாம். இவர்கள் சொல்லும் நபர்கள்தான் பி.ஏக்களாகவோ அல்லது டிரைவர்களாகவோ ஆக முடியுமாம்.எனவே ஒரு முக்கியக் கட்சி இந்த மூன்று பேரையும் தனக்கு சாதகமாக மடக்கியுள்ளதாம். இவர்கள் மூலம் தங்களுக்கு வேண்டப்பட்டவர்களை பி.ஏக்கள் மற்றும் டிரைவர்களாக அது முக்கிய அமைச்சர்கள், அதிகாரிகளிடம் ரகசியமாக நியமனம் செய்துள்ளதாக பரபரப்பாக பேசப்படுகிறது. இதன் மூலம் அரசின் அன்றாட நடவடிக்கைகள், அமைச்சர்களின் நடவடிக்கைகள், அதிகாரிகளின் முக்கிய நடவடிக்கைளை அவர்கள் உளவு பார்த்துச் சொல்கிறார்களாம்.இதனால் முதல்வர் ஜெயலலிதாவுக்கு அரசின் செயல்பாடுகள் குறித்து என்னென்ன தகவல் தெரியுமோ அது அத்தனையும் அந்தக் குறிப்பிட்ட கட்சியின் தலைமைக்கும் முன்கூட்டியே போய் விடுகிறதாம். பல முக்கியத் தகவல்களையும் முதல்வருக்கு முன்பாகவே அந்தக் கட்சியின் தலைமை வாங்கி விடுகிறதாம்.அதை விட உளவுத்துறைக்குத் தகவல் கிடைப்பதற்கு முன்பே அந்த் கட்சியின் தலைமைக்குத் தகவல் போய் விடுகிறது என்கிறார்கள் கோட்டை தரப்பினர்.முதல்வருக்கு வெகு அருகே இருந்தபடிதான் இந்த மூன்று உயர் அதிகாரிகளும் பணியாற்றுகிறார்கள். ஆனால் இதுவரை இவர்கள் குறித்து முதல்வருக்குத் தெரியாமல் இருப்பது குறித்து தலைமைச் செயலக ஊழியர்கள் பெரும் ஆச்சரியத்தை வெளிப்படுத்துகிறார்கள்.'அம்மா'வுக்கு இவர்கள் குறித்துத் தெரியுமா அல்லது விட்டுப் பிடித்து, பின்னர் வேட்டையாடக் காத்துக் கொண்டிருக்கிறாரா என்பது தெரியவில்லை...

பலஸ்தீனத்தில் 10 வருடங்கள் குளியலறையில் தந்தை அடைத்து வைத்திருந்த மகள் விடுவிப்பு

2012-01-24T09:24:00.000-08:00

பலஸ்தீனத்தின் மேற்குக்கரையில் உள்ள குவால்கிவ்லியா பகுதியில் தனது சொந்த தந்தையால் 10 வருடங்கள் குளியறையில் அடைத்து வைக்கப்பட்டிருந்த யுவதியொருவரை அந்நாட்டுப் பொலிஸார் விடுவித்துள்ளனர்.
பாரா மெல்ஹெம் என்ற அச்சிறுமியின் தற்போதைய வயது 21. இவர் 11 வயதாக இருக்கும் போது தனது தந்தையால் வீட்டில் உள்ள குளியறையில் அடைக்கப்பட்டுள்ளார். அதனைத்தொடர்ந்து சுமார் 10 வருடங்கள் வீட்டின் வெவ்வேறு அறைகளில் அடைத்து வைக்கப்பட்டிருந்த அவருக்கு வெறும் பாண் துண்டும், அப்பிளும் மட்டுமே உணவாக வழங்கப்பட்டுள்ளது. நள்ளிரவில் வீட்டைச் சுத்தப்படுத்துவதற்காக அறையை திறந்து விட்டுள்ளார் இவரது தந்தை. இவரது பெற்றோர் இடையே ஏற்பட்ட கருத்து முரண்பாட்டால் இருவரும் விவாகரத்து பெற்றுள்ளனர். இதனையடுத்து தாயார் தனியாக பிரிந்து சென்றுள்ளார்.

பாரா தாயாரிடம் செல்லக்கூடாதென்பதற்காக இவரை அறையில் அடைத்து வைத்துள்ளார் தந்தை.

தங்களுக்குக் கிடைத்த தகவலொன்றின் பேரில் இவரது வீட்டைச் சோதனை செய்த அப்பிரதேச பொலிஸார் பாராவை விடுவித்துள்ளனர்.

தனது அனுபவங்கள் குறித்து ஊடகங்களுக்கு கருத்து தெரிவித்துள்ள பாரா,

" தந்தை என்னை சிறிய வயதிலேயே வீட்டிலுள்ள அறைகளில் அடைத்து விட்டார். நள்ளிரவு வேளைகளில் மட்டுமே அறையைத் திறந்து விடுவார் எனினும் வெளியே செல்ல அனுமதிக்க மாட்டார்.

வெறும் சொற்ப உணவையே எனக்கு வழங்கி வந்தார். நான் வெளியே செல்ல முயற்சித்தால் என்னை வல்லுறவுக்கு உட்படுத்தி கர்ப்பமாக்கி விடுவதாகவும் எச்சரிப்பார்.

மாதத்திற்கு ஒரு தடவையே என்னைக் குளிக்க அனுமதிப்பதுடன் எனது தலைமுடியையும், கண் புருவங்களையும் சவரம் செய்துவிடுவார்.

எனது சிறிய வானொலிப்பெட்டியில் நிகழ்ச்சிகளையும், பாடல்களையும் கேட்பதிலேயே எனது காலம் சென்றது. என்றாவது ஒரு நாள் வெளிச்சத்தைக்காண ஆவலாக இருந்தேன்.

தற்போது எனக்கு எந்தக்கவலைலும் இல்லை" எனக் குறிப்பிட்டுள்ளார்.

பாரா தற்போது தனது தாயாருடன் தங்கியுள்ளார்.

இவர் அடைத்து வைக்கப்பட்டிருந்த குளியலறையின் பரப்பளவு வெறும் ஒன்றரை மீற்றர் மட்டுமே.

பாராவின் தந்தை அவரை இரும்பு ஆயுதங்களால் தாக்கியும் உள்ளார்.

தற்போது கைது செய்யப்பட்டுள்ள இவரது தந்தை இஸ்ரேலிய குடியுரிமையைக் கொண்டுள்ளதால் என்பதால் அவர் இஸ்ரேலிய அதிகாரிகளிடம் ஒப்படைக்கப்பட்டுள்ளார்.

அவரும், அவரின் இரண்டாவது மனைவியும் கூடிய விரைவில் நீதிமன்றத்தில் ஆஜர் செய்யப்படவுள்ளதாகத் தெரிவிக்கப்படுகின்றது.

___

மீனவர் பிரச்சினைக்கு கலாமின் இரு யோசனைகள்

2012-01-24T08:51:00.001-08:00

ஜனாதிபதி மஹிந்த ராஜபக்ஷவுடன் இனப்பிரச்சினை விவகாரம் தொடர்பாகவும் மீனவர்களின் பிரச்சினை தொடர்பாகவும் பேச்சு நடத்தியதாக இந்திய முன்னாள் ஜனாதிபதி அப்துல் காலம் தெரிவித்தார்.
இதில் குறிப்பாக தனக்கும் இந்திய மீனவர்களுக்குமிடையில் நெருங்கிய தொடர்பு உள்ளதால் - இலங்கை ஜனாதிபதியுடன் மீனவர்களின் பிரச்சினை தொடர்பில் முக்கியபேச்சு நடத்தியதாக அவர் குறிப்பிட்டார்."மீனவர்களோடு நன்கு பழகிய மற்றும் மீன்பிடி தொடர்பில் நுணுக்கங்களை அறிந்து வைத்திருப்பவன் என்ற ரீதியில் சில விடயங்களை சுட்டிக்காட்டியிருந்தேன். கடலின் அனைத்து பிரதேசங்களிலும் மீனவர்கள் மீன்பிடி நடவடிக்கையில் ஈடுபடுவர்.மீன்வளம் எங்கிருக்கிறதே அதனைத் தேடி மீனவர்கள் தேடிச் செல்வர். அது இந்தியர்களாக இருக்கட்டும் இலங்கையர்களாக இருக்கட்டும் இல்லையேல் அமெரிக்கர்களாக இருப்பினும் இதனையே செய்வர்.ஆகையினால் மீன்பிடி தொடர்பில் இறுக்கமான சட்டங்களை பிரயோகிப்பது சாத்தியமற்ற விடயம். இதனை ஒரு போதும் யாராலும் இலகுவில் தடுக்கவும் முடியாது" எனவும் டாக்டர் அப்துல் கலாம் கூறினார்.இலங்கை வந்துள்ள இந்திய முன்னாள் ஜனாதிபதி அப்துல் காலம் ஊடகவியலாளர்களுடனான சந்திப்பொன்றை இன்று செவ்வாய்க்கிழமை மேற்கொண்டார்.இச்சந்திப்பின்போது "ஜனாதிபதி மஹிந்த ராஜபக்ஷவுடன் என்னென்ன விடயங்கள் தொடர்பில் உரையாடினீர்கள்?" என்று ஊடகவியலாளரொருவர் கேட்டபோதே அவர் மேற்கண்டவாறு குறிப்பிட்டார்.இருநாட்டு மீனவர் பிரச்சினை தொடர்பில் தொடர்ந்து குறிப்பிடுகையில்..."ஜனாதிபதி மஹிந்த ராஜபக்ஷவுடனான சந்திப்பின்போது மீனவர்களின் பிரச்சினைக்கு இரண்டு தீர்வுகளை முன்வைத்தேன். அதில் முதலாவது, ஏழு நாட்களில் ஒருநாள் மீன்பிடி நடவடிக்கைக்கு ஒய்வு வழங்கல். ஏனைய ஆறு நாட்களில் மூன்று நாட்கள் இந்திய மீனவர்களும் ஏனைய மூன்று நாட்கள் இலங்கை மீனவர்களுக்கும் சாதகமான மீன்பிடி நடவடிக்கையில் ஈடுபட வழிசெய்தல்.இரண்டாவதாக ஆழ்கடல் மீன்பிடி நடவடிக்கையை ஊக்குவிப்பதாகும். இச்செயற்பாட்டில் நவீன வசதிகளைக் கொண்ட கப்பல்களை ஈடுபடுத்தி மீன்பிடி நடவடிக்கையை மேற்கொள்ளல்.குறித்த மீன்களை கப்பலில் வைத்தே பதனிட்டு பொதி செய்து கடல் பிரதேசத்திலேயே மொத்தமாக விற்பனை செய்யமுடியும். இச்செயற்பாடுகள் அனைத்தும் கடல் பிரதேசத்தில் இடம்பெறுவதனால் பல சிக்கல்களை நிவர்த்தி செய்துகொள்ளலாம். குறிப்பாக வரி செலுத்துகின்ற பிரச்சினையும் குறைந்துவிடும்.இந்த இரு யோசனைகளையும் முன்மொழிந்திருக்கிறேன். இந்தப் பிரச்சினைக்கு இனி எவ்வாறு இராஜதந்திர ரீதியில் தீர்வு காண்பது என்பது பற்றி இரு நாட்டின் தலைமைகளும் சிந்தித்து முடிவெடுக்க வேண்டும்" என்று குறிப்பிட்டார்.

வெலிக்கடை சிறைச்சாலை பகுதியில் பதற்றநிலை

2012-01-24T08:33:00.001-08:00

வெலிக்கடை சிறைச்சாலை பகுதியில் பதற்றநிலை ஏற்பட்டுள்ளதாகவும் சிறை வளாகத்தில் துப்பாக்கிப் பிரயோக சத்தம் கேட்டதாகவும் தெரிவிக்கப்படுகிறது. ஆர்ப்பாட்டமொன்றையடுத்து சிறைக்கைதிகள் கட்டிடமொன்றுக்கு தீவைத்துள்ளதாகவும் தீயணைப்பு படையினர் அழைக்கப்பட்டுள்ளதாகவும் தகவல்கள் தெரிவிக்கின்றன.

சந்திரிக்கா தோட்டத்தில் மாயமான மரவள்ளி _

2012-01-24T08:07:00.001-08:00

மு ன்னாள் ஜனாதிபதி சந்திரிகா பண்டார நாயக்க குமாரதுங்கவின் ஹொரகொல்ல வளவில் பயிரிடப்பட்டிருந்த மரவள்ளிக் கிழங்குகள் களவாடப்பட்டிருப்பதாக நிட்டம்புவ பொலிஸ் நிலையத்தில் முறைப்பாடு செய்யப்பட்டுள்ளது.
சுமார் 475 கிலோ கிராம் நிறையைக் கொண்ட மரவள்ளிக் கிழங்கு களவாடப்பட்டிருப்பதாகவும் இதன்பெறுமதி சுமார் 19 ஆயிரம் ரூபா எனவும் தெரிவிக்கப்படுகின்றது.

15 வருடங்களில் இலங்கையில் பாரிய மாற்றம் ஏற்படும்: டாக்டர் அப்துல் கலாம்

2012-01-24T07:51:00.001-08:00

மு ம்மொழிக் கொள்கை அமுல்படுத்தப்படுவதால் அடுத்த 15 வருடங்களில் இலங்கையில் பாரிய மாற்றம் ஏற்படும் என இலங்கை வந்துள்ள அணு விஞ்ஞானியும் இந்திய முன்னாள் ஜனாதிபதியுமான டாக்டர் அப்துல் கலாம் தெரிவித்தார்.
இந்திய முன்னாள் ஜனாதிபதி அப்துல் கலாமின் இலங்கைக்கான ஐந்து நாள் உத்தியோகபூர்வ விஜயத்தின் இறுதி நாளான இன்று செவ்வாய்க்கிழமை ஊடகவியலாளர்களை சந்தித்தார்.இதன்போதே அவர் மேற்கண்டவாறு குறிப்பிட்டார். அங்கு தொடர்ந்து கருத்து தெரிவித்த டாக்டர் அப்துல் கலாம்,"மும்மொழிக் கொள்கை அமுல்படுத்தப்பட்டமையால் இலங்கையிலுள்ள மக்கள் அனைவரும் தமிழ் மற்றும் சிங்களம் ஆகிய இரு மொழிகளையும் தெரிந்தவர்களாக காணப்படுவர். இதற்கு மேலதிகமாக ஆங்கில மொழியிலும் அவர்களால் உரையாற்ற முடியும்.இதனூடாக மக்கள் மத்தியில் ஒர் ஒற்றுமை ஏற்படும். மும்மொழிக் கொள்கை தொடர்பான பாடத்திட்டமொன்றை அறிமுகப்படுத்தல், பாடசாலைகளில் எவ்வாறு மும்மொழி கொள்கையினை அமுல்படுத்தப்படல் தொடர்பில் ஜனாதிபதி மஹிந்த ராஜபக்ஷவுடன் பேச்சு நடத்தினேன்.அத்துடன் 13ஆவது திருத்தச் சட்டத்திற்கு அப்பால் அதிகார வலுவூட்டல் தொடர்பிலும் ஜனாதிபதி மஹிந்த ராஜபக்ஷவுடன் கலந்துரையாடினேன்' என்று டாக்டர் அப்துல் கலாம் மேலும் குறிப்பிட்டார்.

அமைச்சர் டக்ளஸ் தேவானந்தா அவர்கள் கடந்த 20ம் 21ம் திகதிகளில் கலந்து கொண்ட சில நிகழ்வுகளின் வீடியோ தொகுப்பு.!...

2012-01-23T11:35:00.001-08:00

ஈழ மக்கள் ஜனநாயகக் கட்சியின் செயலாளர் நாயகமும் பாரம்பரிய கைத்தொழில்கள் மற்றும் சிறுதொழில் முயற்சி அபிவிருத்தி அமைச்சருமான டக்ளஸ் தேவானந்தா அவர்கள் கடந்த 20ம் 21ம் திகதிகளில் கலந்து கொண்ட சில நிகழ்வுகளின் வீடியோ தொகுப்பு இணைக்கப்பட்டுள்ளது.